តំបន់ភូមិត្រពាំងឈូក សង្កាត់ទឹកថ្លា ខណ្ឌសែនសុខ នៅតែជាប្រភពជួញដូរចែកចាយនិងប្រើប្រាស់គ្រឿងញៀន
28-July-2016 | ដោយ មែន កំសត់
សមត្ថកិច្ចនគរបាលនិងកងរាជអាវុធហត្ថរាជធានីភ្នំពេញ បានចាត់វិធានការបង្ក្រាបបទល្មើសជួញដូរ ចែកចាយ និងប្រើប្រាស់គ្រឿងញៀនក្នុងតំបន់ភូមិត្រពាំងឈូក សង្កាត់ទឹកថ្លា ខណ្ឌសែនសុខ ជាច្រើនលើក ចាប់តាំងពីអំឡុងខែមករា ដល់ខែកក្កដា ឆ្នាំ២០១៦។ ទោះជាយ៉ាងណាប្រភពពីប្រជាពលរដ្ឋក្នុងភូមិត្រពាំងឈូក បានឲ្យដឹងថាបទល្មើសជួញដូរចែកចាយនិងប្រើប្រាស់គ្រឿងញៀនក្នុង មូលដ្ឋាននេះ នៅតែកើតឡើងយ៉ាងពេញបន្ទុក ព្រោះមេខ្លោងធំៗមិនទាន់ត្រូវបានសមត្ថកិច្ចចាត់វិធានការបង្ក្រាប នៅឡើយ។ ប្រជាពលរដ្ឋបានអំពាវនាវឲ្យលោក ជួន សុវណ្ណ ស្នងការ នគរបាលរាជធានីភ្នំពេញ ក៏ដូចជាលោក ប៉ា សុជាតិវង្ស អភិបាលរាជធានីភ្នំពេញ ចាត់វិធានការបង្ក្រាបបទល្មើសគ្រឿងញៀននៅភូមិត្រពាំងឈូក ប្រកបដោយប្រសិទ្ធភាព ដើម្បីកុំឲ្យបទល្មើសរាលដាលតទៅទៀត។
អ្វីដែលគួរឲ្យកត់សម្គាល់នោះ គឺថ្មីៗនេះសមត្ថកិច្ចនគរបាលខេត្តកណ្ដាល បានធ្វើការឃាត់ខ្លួនឈ្មួញជួញដូរគ្រឿងញៀន២នាក់នៅស្រុកកោះធំ ខេត្តកណ្ដាល ហើយតុលាការបានសម្រេចឃុំខ្លួនពួកគេកាលពីថ្ងៃទី២៦ ខែកក្កដា ឆ្នាំ២០១៦។ តាមចម្លើយរបស់ជនសង្ស័យទាំង២នាក់នោះ បានឲ្យដឹងថាពួកគេទិញគ្រឿងញៀននៅតំបន់ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ដើម្បីយកមកចែកចាយនៅក្នុងឃុំសំពៅពូន ស្រុកកោះធំ ខេត្តកណ្ដាល។ ការឆ្លើយសារភាពរបស់ជនសង្ស័យជួញដូរគ្រឿងញៀននៅស្រុកកោះធំបែបនេះ ជាភស្ដុតាងបង្ហាញថាភូមិត្រពាំងឈូក គឺជាទីតាំងដ៏ធំក្នុងការជួញដូរចែកចាយគ្រឿងញៀនទៅកាន់តំបន់ផ្សេងទៀត ។
សូមបញ្ជាក់ដែរថារយៈពេលប៉ុន្មានថ្ងៃកន្លងទៅនេះ សមត្ថកិច្ចនគរបាលនិងសមត្ថកិច្ចកងរាជអាវុធហត្ថតាមបណ្ដាខណ្ឌមួយចំនួន ក្នុងរាជធានីភ្នំពេញ បានបង្ក្រាបបទល្មើសជួញដូរចែកចាយនិងប្រើប្រាស់គ្រឿងញៀនជាច្រើនករណី ឃាត់ខ្លួនជនសង្ស័យជាច្រើននាក់ និងរឹបអូសវត្ថុតាងយ៉ាងច្រើនសន្ធឹកសន្ធាប់ ក្នុងនោះមានទាំងកាំភ្លើងខ្លីផងដែរ។ ប្រការនេះហើយដែលធ្វើឲ្យប្រជាពលរដ្ឋទូទៅព្រួយបារម្ភយ៉ាងខ្លាំងអំពើ បញ្ហាអសន្តិសុខសង្គមក្នុងរាជធានីភ្នំពេញ ហើយអំពាវនាវឲ្យលោក ជួន សុវណ្ណ ស្នងការនគរបាលរាជធានីភ្នំពេញ ក៏ដូចជាលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ យកចិត្តទុកដាក់បន្ថែមទៀតក្នុងការពង្រឹងសន្តិសុខសង្គម។ ប្រជាពលរដ្ឋទូទៅអំពាវនាវឲ្យមានការបង្ក្រាបបទល្មើសគ្រឿងញៀនក្នុង តំបន់ភូមិត្រពាំងឈូកជាប្រចាំ ព្រោះតំបន់នេះជាទីតាំងសម្រាប់ចែកចាយគ្រឿងញៀនទៅកន្លែងផ្សេងៗទៀតផង ដែរ។
នៅវេលាម៉ោង១០និង៣០នាទីព្រឹក ថ្ងៃទី២៧ ខែកក្កដា ឆ្នាំ២០១៦ សមត្ថកិច្ចបានធ្វើការបង្ក្រាបក្រុមជនសង្ស័យជួញដូរចែកចាយ និងប្រើប្រាស់គ្រឿងញៀនចំនួន២០នាក់ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ។ ប្រភពពីសមត្ថកិច្ចបានឲ្យដឹងថា នៅក្នុងការបង្ក្រាបនោះមានរឹបអូសវត្ថុតាងមួយចំនួនផងដែរ ហើយក្រុមជនសង្ស័យទាំង២នាក់ត្រូវបញ្ជូនទៅអធិការដ្ឋាននគរបាលខណ្ឌសែនសុខ ដើម្បីចាត់វិធានការតាមនីតិវិធី។ ការដែលបទល្មើសគ្រឿងញៀនក្នុងភូមិត្រពាំងឈូក នៅតែកើតឡើងយ៉ាងរាលដាល គឺជាមូលហេតុដែលធ្វើឲ្យប្រជាពលរដ្ឋព្រួយបារម្ភយ៉ាងខ្លាំងពីបញ្ហាអសន្តិសុខសង្គម៕
ចំនួនអ្នកទស្សនា
- ថ្ងៃនេះ8511
- ម្សិលមិញ6261
- សប្តាហ៍នេះ26891
- ខែនេះ142041
- ឆ្នាំនេះ142041
- សរុប20584497